१९ चैत, काठमाडौं । खाजाघरको आवरणमा अवैध यौनधन्दा सञ्चालन गरेको आरोपमा दुई जना पक्राउ परेका छन्।

पक्राउ पर्नेमा सिन्धुपाल्चोकको इन्द्रावती गाउँपालिका–९ की ३७ वर्षीया सुकुमाया तामाङ र इन्द्रावती–४ का ३१ वर्षीय प्रमोद तामाङ रहेका छन्। उनीहरूलाई मानव बेचबिखन अनुसन्धान ब्यूरोको टोलीले नियन्त्रणमा लिएको हो।

प्रहरीका अनुसार सुकुमायाले मनमैजुस्थित ‘अशोक खाजाघर’ र प्रमोदले सञ्चालन गरेको ‘मञ्जुश्री घर’ मार्फत यौनधन्दा सञ्चालन गर्दै आएका थिए। भाडा माझ्ने तथा सरसफाइको काम दिने भन्दै मासिक ७ देखि १५ हजार रुपैयाँ तलबको प्रलोभन देखाएर युवतीहरूलाई काममा राखी यौनधन्दामा लगाइएको आरोप छ।

दुवैजनाविरुद्ध मानव बेचबिखन तथा ओसारपसार सम्बन्धी कसुरमा काठमाडौं जिल्ला अदालतबाट ७ दिनको म्याद थप गरी अनुसन्धान अघि बढाइएको ब्यूरोका एसएसपी कृष्ण पंगेनीले जानकारी दिएका छन्।